Á Gamla hospitali umleið 1890. Mamma og ein sjúkrasystir við einum smádrongi. Fornminnissavnið

Sálareyga

Í  sambandi við at Sinnisbati verður 40 ár í dag gevur Sprotin út bók, sum Grækaris Djurhuus Magnussen hevur skrivað um felagið. Alt yvirskotið av bókini fer til arbeiðið hjá Sinnisbata.

24.05.2022
Sprotin
Bókaprát

SÁLAREYGA er bókin um 40 ára søguna hjá Sinnisbata. Um felagið, sum síðan stovnanina í 1982 hevur arbeitt fyri rættindunum hjá fólki við sálarsjúku í Føroyum. Longu sjey ár eftir stovnanina, í 1989, hevði felagið keypt tvey hús, sum síðan hava verið nýtt sum bústovnar til sinnisveik.

Av fremstu málunum hjá felagnum hevur alla tíðina verið at kunna um sálarsjúkur og viðurskifti, sum hava við sálarsjúkur at gera. Heilt frá byrjanini vórðu fyrilestrar um sálarsjúku hildnir ymsastaðni í Føroyum. 

Tað hevur ligið frammarlaga hjá felagnum at avstigmatisera og avtabuisera tað at hava sálarsjúku. Amboðini hava verið mong, millum annað nógvu fyrilestrarnir, altjóða sálarheilsudagurin og upplýsingar og viðmerkingar í miðlunum.

Í bókini verður hugt aftur í søguna hjá teimum umleið 300 føroyingunum, sum frá 1890 til 1969 noyddust av landinum til viðgerðar, tí umstøður vóru ikki til tað í Føroyum. Tey komu til eitt fremmant land, innløgd millum fremmand fólk, har málið eisini var fremmant. Fleiri teirra komu ongantíð heim aftur.

Í 1969 læt Statshospitalið upp fyri sjúklingum. Vit hava samrøður við fyrrverandi starvsfólk um umstøðurnar tá og um tíðina, tá ið føroyskir sjúklingar komu heim úr Danmark og vórðu innlagdir á Statshospitalið í staðin.

SÁLAREYGA, sum m.a. merkir sálarligur sansur og andligt gløggskygni, er partur av sálarsjúkusøguni í Føroyum.

24.05.2022
Sprotin
Bókaprát

More articles