Komandi ár verður øld runnin, síðan Jóannes bóndi fór undir sítt politiska lív, sum hann stóð í alla ævi sína — í nærum hálva øld. Somuleiðis verða eisini hundrað ár liðin, síðan Kristin í Geil tók upp lívsstarv sítt sum blaðstjóri á nýggja blaðnum TINGAKROSSI. Áskoðanir kunnu vera ymiskar um ta politisku gongd, sum kom í fyrst í tjúgundu øld. Har hekk so nógv við: verklig, búskaparlig, mentanarlig og tjóðskaparlig stríðsmál. Tey, ið kanna hesi samfelagsviðurskifti, verða skjótt sannførd um, at teir báðir fingu hvør á sín hátt ta felags lagnu - sum samfelagsbøtarar altíð fáa - at rógva harðan andróður og at standa í andgletti. Henda stríðsstøðan setti síni eyðkenni á teirra egna lív og lagnu, men setti eisini síni djúpu spor í samfelagið, í Føroya fólks áskoðan á seg og alt sítt.