Snorri lýsir, hvussu heimurin varð skaptur, hvussu menniskjan varð til, og hvussu samfelagið varð skipað. Her er tað stóra kosmiska træið, Askin Yggdrasil, sum heldur øllum uppi, sum bindur himmal, jørð og undirgrund saman í eind og heild. Í miðdeplinum er søgan um Baldur, gudin, ið verður dripin eftir ráðum frá tí svikafulla Loka, og hetta svik og ­deyðsfall boðar frá enda á øllum og tann endaliga undirgangin. Í sein­asta stríðnum berjast gudar móti jøtnum, og allur heimurin gongur til grundar í heimseldinum.