Í havsins hjarta er skaldsøga um tíðina frá jólafundinum gjøgnum tjóðskaparrørslu, heimsbardaga, fólkaatkvøðu, kalda kríggið og stóra skædlið fram til fólkafundin á Slættaratindi. Ein søga um vónir og vónbrot í hundrað ár, sæð við eygunum á einum, sum er heima og burturi í senn, eygleiðari, droymari og samstundis luttakari.

 

Gunnar Hoydal skrivar sær sjálvum líkt tekstir við støði í egnum royndum, ólíkar og títt skiftandi millum heilaspuna og veruleika, minningarbrot og frían skaldskap, her sett saman í 39 partar til eina breiða skaldsøgu um heimin, landið og tíðina.

 

Skrivað um skaldsøgur eftir Gunnar Hoydal:

Undir suðurstjørnum er ein einastandandi skaldsøga: lond og tíðir tvinnast saman, tað persónliga og tað samfelagsliga renna saman í eitt…eitt stórt skaldaverk – gandur, veruleiki, skemt og vakurleiki, alt í gávumildari yvirflóð.                                                                                                   

Fay Weldon    

 

Anne-Kari Skarðhamar

 

Í havsins hjarta: Beinagrindin ættarsøga, á hitt borðið tíðarmyndir. Stórsligið og rørandi – og ein politisk viðmerking við ólivaðum og, ið hvussu er, óskrivaðum framhaldi. Eitt stórverk er hetta í øllum førum.

Heðin M. Klein