Hvørt árið hevur sín serliga dám
2011 fer í søguna hjá SPROTANUM sum árið, ið prógvaði, hvussu nógv kemur burturúr, tá ið vit standa saman um stórmál.
Tað var í avgust, í summalýkku, og klúkarnir skróvaðu, tá ið seinastu avtalurnar um at fáa allar orðabøkurnar ókeypis inn í allar skúlar í Føroyum vórðu gjørdar.
Orðabókagrunnurin og SPROTIN gingu saman í samstarv, og aðalstjórin í mentamálaráðnum, mentamálastjórin og landsstýriskvinnan í mentamálum tóku ta slóðbrótandi avgerð, at nú skuldu allir skúlar hava ókeypis telduorðabøkur, tí einki mundi muna meira í arbeiðinum fyri føroyskum enn júst tað.
Orðabókagrunnurin og SPROTIN gingu saman í samstarv, og aðalstjórin í mentamálaráðnum, mentamálastjórin og landsstýriskvinnan í mentamálum tóku ta slóðbrótandi avgerð, at nú skuldu allir skúlar hava ókeypis telduorðabøkur, tí einki mundi muna meira í arbeiðinum fyri føroyskum enn júst tað.
Málsligi veruleikin rúmkaðist í Føroyum í góðveðrinum í august. Partur SPROTANS lá ikki eftir.
Vit fóru síðan undir annað arbeiði – at gera e-bøkur. Hetta arbeiðið heldur fram í 2012, tá ið vit lansera e-bókaportal, sum vónandi eisini fer at verða ljóðbókaportalur. Gongst, sum vit ætla, verður tann portalurin veruleiki í vár.
Vit vita, at áhugin fyri føroyskum bókmentum er stórur úti í heimi, og vit vita eisini, hvussu torført tað er hjá útlendingum at kunna seg um og ogna sær føroyskar bøkur. Tí verður nýggi portalurin á føroyskum og enskum, so ØLL bara verða trý klikk frá at keypa sær eina føroyska bók, sama hvar tey búleikast.
Ein portalur megnar onki í sjálvum sær, men verður væl kunnað og marknaðarført á t.d. bókamessum, verður portalurin gluggin inn í okkara bókmentaligu gripir.
SPROTIN takkar hjartaliga fyri alt tað arbeiðið, ið fólk við hegni og eldhuga hava lagt í forlagið í ár og takkar viðskiftastovnum og einstaklingum fyri gott samstarv.