Mong halda pólska høvundin Joseph Conrad (1854 – 1924)  vera ein av teimum allarstørstu enskmæltu høvundunum, hóast hann ikki lærdi seg enskt fyrr enn hann var í 20-árunum og var farin um tey tríati, tá ið hann gjørdist bretskur ríkisborgari.

Í 30 ár sum høvundur skrivaði Conrad 19 skaldsøgur og ein hóp av stuttsøgum og ritroyndum. Hann verður hildin at vera ein av teimum, ið slóðaði fyri nýtíðarligu bókment­un­um, tað av verkum hansara, sum gjørdist tað kendasta, var Hjarta myrkursins frá 1902.