Maðurin við topphúgvuni er søgan um ein trukkførara úr Runavík, ið droymdi um eina tilveru sum yrkisspælari. Hann kom sum eitt skot inn á altjóða fótbóltspallin í 1990, tá føroysku amatørarnir skakaðu alt Evropa við at vinna 1-0 á Eysturríki. Við eitt var óvanliga stórur áhugi fyri manninum, sum spældi fótbólt í sjáldsomu topphúgvuni. Tíðindamenn í hópatali vitjaðu føroysku oyggjarnar, og útlendsk fótbóltsfeløg sýndu honum áhuga.