Longu í 1946 gav Norrøna Forlagið út bókina BUMBUR YVIR FØROYAR við frásøgnum um hendingar og vanlukkur, sum seinni heimsbardagi hevði við sær í Føroyum.

Greitt verður frá gongdini í krígnum, og hvørji tiltøk myndugleikarnir í Føroyum settu í verk. Her eru brot úr lógum og reglugerðum, og somuleiðis viðmerkingar úr bløðunum. Eisini verður nomið við fíggjarligu umstøðurnar og tryggingarviðurskifti.  

Frágreiðingarnar frá teimum, sum vóru mitt í hendingunum, gera bókina nærverandi og livandi. Sagt verður frá, hvussu fólk noyddust at flýggja úr bygdini, og hvussu stóð til umborð á skipi, ið varð bumbað. Flestu frásagnirnar eru, sum vera man, álvarsamar, men okkurt skemtiligt er eisini tikið við.