Hvussu ber tað til, at vit ongantíð hava havt veruligan landbúnaðarskúla í Føroyum? Í 1890 heitti Løgtingið á tann 26 ára gamla, framfýsna  Jóannes Patursson bónda um at átaka sær at standa fyri royndarbrúki á garði sínum í Kirkjubø. Hann skuldi eisini hava næmingar í læru í nýskapandi royndararbeiði sínum. Virksemið byrjaði í 1892, og fyrsti næmingurin kom í læru árið eftir. Í 1898 helt Jóannes Patursson, at nú var grundarlag lagt undir ein veruligan búnaðarskúla í Føroyum og ætlaði sær at halda fram. Men føroysku myndugleikarnir vildu heldur steðga hesum framtakinum.