Grøðandi sjógvur

Gerandisdagurin við øllum tí gerandisliga. Gerandisdagurin við sínum tankameldri um alt hugsandi. Gerandisdagurin við sínum afturlitum og vónum og undran. 

Í øllum ymisleikanum  finnur tú vinalag, forvitni, og mangan er eini darrandi órógv botnur í yrkingini.

Alt latið í ein hóskiligan, málsligan gerandisbúna. 

FORTÍÐIN

eftir meg
liggja løtur

                 sum av og á
                 vitja aftur
                 til mín

                                     og leggja
                                     hald á friðin

Snæbjørn hevur skipað bókina í fýra partar um ljós og um myrkur, um dagar og um náttúru.
Ein partur er ógviliga persónligur - um upphavið og næstringarnar, um gleði og sorg, tilveruundran og dreymar. 

MINNIÐ

at hava eitt minni

at hava
atgongd til minni

     at hava avmarkað
     atgongd til minni

         at hava skiftandi atgongd
         til minni

         ikki at hava atgongd
         til minni

             at portrið til minnið
             er stongt

Ein partur er meira sveimandi og fabulerandi. 

NÝGGI DAGURIN

nýggi dagurin hevur ikki
fingið andlit
men er ávegis av himni

í stjørnukappa
ferðast hann
við ferð
ímóti jørðini

     tá hann kastar kappan
     stendur hann fagur og nakin
     við hondunum fullum av ljósi

          við sínum fínu fingrum
          letur hann tímarnar
          dryppa úr ævinleikanum
          ein fyri
          og annan eftir

                  hann vaskar fjøllunum
                  við sínum brennandi smíli

                  á sínum herðum ber hann
                  túsund ókendar søgur