Bókin er ein týðing av bókini hjá Kinnu Poulsen Í Eygnahædd. Um samtíðarlist í Føroyum í 21.øld, sum vann M.A.Jacobsens virðisløn fyri yrkisbókmentir og sum síðani er vorðin so sera jaliga ummæld á Vágskálini og í Varðanum. Marita Thomsen hevur týtt bókina til enskt so at teksturin um ta sterku føroysku samtíðarlistina nú kann lesast um allan heim. Bókin verður løgd fram í Føroyum og í Danmark seinni í summar og í heyst.

Við á framsýningini í Scandinavia House verða 21 listafólk úr Íslandi, Grønlandi, Noregi og Føroyum. Emily Stoddart, sum er kurator í Scandinavia House hevur kuraterað framsýningina í felag við Karin Hellandsjø í Noregi, Pari Stave í Íslandi og Kinnu Poulsen, ið er boðin til New York saman við Jóhan Martini Christiansen og Hansinu Iversen – listafólkini skulu gera eitt verk saman á framsýningini. Annars verða ikki færri enn fimm føroyingar í framsýningarhópinum, ið telur mong áhugaverd og etablerað listafólk. 

Tað er ilt at siga, hvat kemur burtur úr bókaframløgu og framsýning, men eingin ivi er um, at hetta er ein stórur møguleiki hjá føroyskum listafólkum at knýta bond við listafólk og listaumhvørvið í Norðurlondum og altjóða. Hesin møguleiki var ikki komin, um ikki almennu Føroyar fyri tveimum árum síðani avgjørdu at hava eina føroyska listaframsýning og presentatión av føroyskari list og mentan í New York. Átakið hevur longu fingið fleiri samstørv at næla. 

Framsýningarheitið Inside Voices, Outside Light er ein regla hjá íslendska skaldinum Sigurði Pálsson, hvørs enskmælta bók frá 2014 hevði sama heitið. Luttakandi listafólk verða Morten Andenæs (NO), The Arctic Creatures (IS), Per Barclay (NO), Ask Bjørlo (NO), Jóhan Martin Christiansen (FO), Helgi Þorgils Friðjónsson (IS), Inuk Silis Høegh (GL), Hansina Iversen (FO), Rannva Kunoy (FO), Nils Erichsen Martin (NO), Trine Lise Nedreaas (NO), Camille Norment (NO), Lisbeth Karline Poulsen (GL), Ragna Róbertsdóttir (IS), Agnieszka Sosnowska (IS), Inuuteq Storch (GL), Silja Strøm (FO), Steina og Woody Vasulka (IS), og Jens Dam Ziska (FO). Bókin At Eye Level verður til sølu í bókabúðum, framløga verður sum áður nevnt seinni.