Hvør var hon - hendan unga kvinnan, sum longu í 1923 fór av Havnini til London við dreyminum um at gerast listafólk, og sum nam sær útbúgving frá Kunstakademiet í Keypmannahavn, áðrenn Sámal Joensen-Mikines? Og hvør gjørdist síðani lagna hennara? 

Bókina um Bergithe Johannessen hava donsku rithøvundarnir Anya Mathilde Poulsen og Gunvor Bjerre skrivað. Anya Mathilde Poulsen hevur í nógv ár fingist við at skriva um listakvinnur og hevur eitt nú skrivað bókina Vilde kvinder, mørke toner - om køn og musik; eisini týðir hon føroyskan skaldskap til danskt. Gunvor Bjerre er journalistur, rithøvundur og væl kend í danskari sjónvarps- og útvarpsframleiðslu.

Í prátinum fara rithøvundarnir at siga eitt sindur um listina hjá Bergithe Johannessen og hennara áhugaverda lív millum Føroyar, London og Keypmannahavn – eitt lív, sum bar dám av dirvi, listarligum ætlanum og einum inniligum kærleika til stórbæra, føroyska landslagið. Vatnlitsmyndirnar hjá Bergithe Johannessen eru eyðmerktar við serligum sansi fyri ljósi, formi og huglagi; í dag hanga fleiri av verkum hennara í føstu framsýningini á Listasavni Føroya, men í bókini eru nógvar myndir av málningum, sum ongantíð áður hava verið vístir alment.

Tiltakið varpar ljós á lagnuna hjá einari sermerktari listakvinnu, sum tó als ikki er komin við í søguskrivingina, og sum nú gerst partur av einari størri samrøðu um plássið í listasøguni, sum higartil er unt listakvinnum - bæði í føroyskum og norðurlendskum samanhangi.

Solveig Hanusardóttir Olsen, stjóri á Listasavni Føroya, setur tiltakið.

TÍÐSPUNKT: Ley. 15. november 2025, kl. 12.00
LONGD: 45 min.
HØLI: Skálin
MÁL: Danskt