Orð og tónar á mentanarnáttini
Í fleiri ár hevur Sprotin skipað fyri bókmentaligum kvøldum á Reinsarínum. Og hetta væleydnaða tiltakið endurtaka vit á mentanarnáttini kl. 20.30. Hesa ferð verða tað framløgur, samrøður og góður tónleikur.
Kinna Poulsen – Í eygnahædd
Kinna Poulsen leggur fram sítt nýggja stórverk Í eygnahædd, sum er ein viðkomandi og aktuell lýsing av føroysku samtíðarlistini. Hansina Iversen bjóðar vælkomin við eini røðu um nýggju listina, áðrenn Kinna letur dyrnar upp fyri einum heimi av litum, forvitni og listarligum fjølbroytni – við myndum á stórskíggja. Tað verður bæði provokerandi og hugtakandi.
Stan Abbott og Magni Arge – Føroyar í broyting
Bretin Stan Abbott, ið hevur sett síni djúpu spor í føroyska ferðavinnu og menningarsøgu, hevur skrivað eina nýggja bók um broytingar og menningina í Føroyum seinastu 20 árini. Á pallinum hittir hann Magna Arge til eina hugvekjandi samrøðu um eyg- og hugleiðingar gjøgnum 20 ár.
Jógvan Isaksen – Føroysk bókmentasøga, bind 2
Jógvan hevur júst givið út sítt seinna bind av føroyskari bókmentasøgu. Jógvan leggur bókina fram og greiðir frá áhugaverdum táttum í henni.
Tann altíð frálíka Guðrið Hansdóttir fer eisini at spæla nøkur løg. Til ber at keypa sær bøkurnar á staðnum og eisini at fáa tær signeraðar.
Nær: Fríggjadagin 6/6 kl. 20:30
Hvar: Reinsaríið
Prísur: Ókeypis