Kortini hevur óskikkurin, sum óskikkur ofta vil, lyndi til at taka seg uppaftur í broyttum líki. Tak eitt nú viðtalið í sjónvarpinum hóskvøldið við harra Kaj Leo Johannesen, okkara alra náðigasta lögmann "udi Færø". Gaman í, hvørki lögmaður ella spyrjarin hjá sjónvarpinum hövdu ímað seg um skortin, men viðtalið hevði alt tað sama egyptiskt yvirbragd á sær. Her er tó ikki meint við at lögmaður, fyrrnevndi Kaj Leo Johannesen, tók seg út sum ein onnur Nefertite á skíggjanum og talan skjótt sagt var um eitt av teimum drottningaviðtölunum, sum leingi hava verið reglan í føroyskum miðlum heldur enn undantakið. Her er meint við at tað er ódømið, hvussu spilt og avmergjað vald ósnikkað sleppur at gera seg stovubært hjá ósemjuræddum veljarum undir einum yvirlæti av ábyrgd, vandaðum arbeiðslagi og vilja til gagns og vælferð fyri öll. Lögmaður sá út sum ein bleik útgáva av Mubarak forseta, hevði sama kú-syrgna útlitið í eygunum, sama fyrilagsta tóna í röddini og somu haldleysu uppáhald í málflutningi sínum um stjórnarlagið og politikkin hjá sær, somu hyljing yvir eina skipan, sum ikki bjóðar betri líkindi til nakra framtíð enn rot bjóðar til ungdóm í rossaræi. Alt í einum brann sjónvarpsskíggin sum ein viti av blokkstuðli og boðaði frá at alt var í fínasta lagi hjá okkum í Føroyum, öll hagaportur himmiríkis stóðu føroyingum opin í ríkisfelagsskapi og ES um tað galt. Einans var syndin í verðini og hon at ivast í lögmanni og tí sum lögmaður sigur um seg sjálvan og sítt landsstýri, um skilið í samfelagnum, í búskapinum, í fyrisitingini. Um alt. Hvat sum er (eitt nú hetta at lögmaður visti seg ivaleysan í íslendskum ES-limaskapi, hóast áskoðanarkanningar vísa, at ein greiður meiriluti av íslendingum áhaldandi er ímóti limaskapi).

Nú røkist fyri einum umskifti í Egyptalandi og politiski flórurin har suðuri verður helst sópaður í næstum. Hjá okkum afturímóti, her norðuri á klettinum, sýnist eingin vilji vera til annað enn at skumpa útyvir ella í besta lagi at skumpa lortin um í samfelagnum.

Spyrst so livst.

Amen