Eitt av hesum undangongufólkum er lærarin Svenning Tausen. Hann er ættaður úr Hovi, tók prógv frá Føroya Læraraskúla í 1958, og sum so mangir aðrir góðir hovbingar hevur hann djúpar ættarrøtur úr Stórhúsi.

Lutur hansara til frama fyri føroyskt mál er ómetaligur. Í mong ár hevur hann rættlisið og vegleitt fólk, sum hava leitað sær ráð hjá honum, tá ið tey skuldu hava okkurt handrit prentað. Skal eg gita, er talan um ikki undir 10.000 blaðsíður. Gløggur og beinasamur hevur hann lagt ungum og gomlum, høgum og lágum lag á. Aftur at sær í hesum arbeiði hevur hann havt konu sína, Amy, sum er ættað úr Rituvík, og sum hevur málkenslu og sjáldama gott máloyra.

Svenning hevur havt serligan áhuga fyri føroyskum máli, men eisini støddfrøði, alisfrøði, evnafrøði, lívfrøði, fuglafrøði, jarðfrøði og landafrøði. Og hann veit sum fáur skil á, hvør ið er skyldur við hvønn í Føroyum.

Hegnisliga hava tey bæði við bøtandi hond vegleitt og borið fram uppskot um broytingar og hava umvælt. Tey hava lagt lív og sál í at fáa tekstin so vakran, fyndarríkan og beinraknan sum gjørligt. Málsliga var Svenning stak væl áborin heimanífrá, og til tess at búgva seg enn betur út, gekk hann á Málstovni Føroya hjá Chr. Matras og hevur sogið sær málsliga føði frá málfrøðingunum Tórarini Evensen, Johan Fritzner, Leiv Heggstad og Jan de Vries.

Um lærarastarv Svennings ber til at lesa í bókini FØROYSKIR FÓLKASKÚLALÆRARAR.

Svenning var millum oddamenninar at fáa Bókamiðsøluna setta á stovn. Hann var formaður í nevndini í 12 ár. Harumframt hevur hann verið uppi í so mongum felagsarbeiði til frama fyri Føroya skúla og føroyskt kirkjumál.

Torført er at taka nakað fram um annað, sum hann hevur týtt til føroyskt, men BÍBLIUSØGUR 1 og 2, sum Skúlabókagrunnurin hevur givið út í fleiri útgávum, man vera millum tað besta.

Aðrar bøkur frá hansara hond eru: ORÐ UM ORÐ 1 og 2, ORÐ OG ORÐAÐ. Hetta eru serstakliga hentar handbøkur, har hann hevur leitað fram óteljandi dømi um vánaligan málburð og kemur við sínari bøtandi hond við uppskotum um betri málburð. Saman við øðrum hevur hann givið okkum hesar bøkurnar: NÁTTÚRUSØGULIGUR ORÐALISTI, KRISTNIKUNNLEIKI TIL SKÚLABRÚKS, LINDÝR, ÆTTIN UNGA, BÍBLIUKORTABÓK, FUGLAR Í NORÐURHØVUM, LITFLORA, og ikki minst tað glæsiliga verkið HEIMSATLAS, sum nú verður umvælt til nýggja útgávu.

Í 1990 fekk Svenning Bókmentavirðisløn M.A.Jacobsens fyri yrkisbókmentir.

Tað var eitt satt ódnartak og eitt bragd, sum Svenning tók saman við okkara fremstu mentafólkum, tá ið tey settu sær fyri at útvega barnaskúlanum tilfar á móðurmálinum. Vit áttu mangt og hvat á føroyskum umframt Føroya Floru og Dýralæru hjá vágamonnunum Rasmusi Rasmussen og Mikkjali á Ryggi, men í staðin fyri alt tað danska fingu vit nú smáar bøkur í at kalla øllum evnum inn um skúlagátt, hóast illa stóð til og stendur til við undirvísingartilfari til miðnámsútbúgving og tílíkt.

Vit kunnu til stuttleika nevna heftini, sum Føroya Náttúra-Føroya Skúli gav út. Sumt var týtt, og okkurt var upprunaligt føroyskt tilfar: Gróður og gróðrarvánir (1952), Gagnfiskar í Føroyum (1953), Sjógvurin (1954), Fiskalikamið (1955), Firvaldar (1956) Lindýr (1964), Hvalur og kópur (1960), og so framvegis.

Eg var so heppin at fáa Svenning til lærara í realskúlanum í Hoydølum. Sum næmingur var eg tornæmur og balstýrin, men Svenning var tolin og nærlagdur. Hetta sama bera øll honum, sum eg havi hitt aftur seinni. Næmingar, sum hava havt Svenning Tausen sum lærara, ganga ikki sum skarvur tunguleysi.

Svenning og hansara ættarlið av lærarum varð onkuntíð forhánisliga kallað "seminaristarnir". Men tað er munur á, at hesir "seminaristar" løgdu meiri skrivligt tilfar eftir seg til frama fyri føroyskan ungdóm enn teir akademikarar og aðrir danskt sinnaðir, sum settu seg í best løntu sessirnar í Føroyum og lítið og einki løgdu í, hvat mál teir brúktu í frálæru sínari. Men enn er langt á mál.

Týsdagin 12.apríl fer Svenning Tausen um tey 75. Tað var honum til eydnu lagað at fáa Amy, f. Olsen, úr Rituvík til konu. Hon hevur týtt fleir bøkur av einlistum og fekk í 1996 Barnabókavirðisløn Tórshavnar býráðs. Tey bæði eiga børnini Duritu og Magnus.

Tilfarið frá Svenningi og Amy slær ikki falskar mentir.