Sólrún Michelsen hevur skrivað nýggja skaldsøgu um Sáru Malenu í Skúgvi, sum fekk so margháttliga lagnu. 
Hon var so løgin og óstýrilig, at pápin mundi tikið lívið av henni.

Hon var einsamøll og forfjónað, happað og útihýst og upplivdi ongantíð kærleika. Seinni var hon løgd undir at duga gand, tí ræddust fólk og skýggjaðu hana.

Hanus Kamban fer at siga frá Sáru Malenu, sum skúvingar mintust hana, og eftir tað fer Bergljót av Skarði at tosa við høvundin um bókina.

Og so ein heilt øðrvísi matbók, ið nevnist Góðkrút.

Bókin lýsir alt tað ókrút, sum veksur her. Plantur, sum í síni tíð vóru fluttar inn sum heilsukostur og lekjandi urtir. Bókin gevur okkum kunnleika um hesar plantur, hvussu vit handfara tær skynsamt, og hvussu tær kunnu nýtast til matna.

Planturnar eru royndar, ein ørgrynni av leskiligum uppskriftum eru royndar og lýstar í bókini. Ikki er minni áhugavert at hoyra, hvussu hesar plantur vórðu nýttar sum heimaráð, hvørjir siðir og hvør trúgv vóru knýtt at teimum.

Høvundarnirnir Disa Christiansen, Hansa Christiansen, Joan Sørinardóttir greiða frá, og ukrainski myndamaðurin, Ihor Zaitsev, sum nú býr í Nólsoy, greiðir frá myndunum.

Tónleikin hetta fagra kvøld fáa vit frá Lenu og Niclasi.

Kom og lurta eftir góðum práti um lagnur, fordómar, ókrút, góðkrút og onnur áhugaverd fyribrigdi á Reinsarínum hóskvøldið 26. okt kl. 20.00.

Barrin er opin, har fæst kaffi, te, øl og vín – og bøkurnar eru sjálvandi til keyps fyri lagaligan prís.